არქეოლოგიური გათხრები იმირის გორაზე

2013 წლის 2 სექტემბერს მარნეულის მუნიციპალიტეტში, სოფ. იმირის მახლობლად მდებარე უძველეს (ძვ.წ.VI. ათასწლეული) ნეოლითური ხანის ნასოფლარზე-გადჭრილ გორაზე დაიწყო არქეოლოგიური გათხრები. არქეოლოგიურ კვლევას ერთობრივად ანხორციელებს საქართველოს ეროვნული მუზეუმი და საფრანგეთის სამეცნიერო კვლევის ეროვნული ცენტრი (CNRS).

პირველი არქეოლოგიური გათხრები სოფ. იმირში XX საუკუნის 60-იან წლებში ჩატარდა. წლების წინ ჩატარებულმა არქეოლოგიურმა სამუშაოებმა გამოავლინა 7000 წლის წინანდელი დასახლება, სადაც პირველად კაცობრიობის ისტორიაში დაიწურა ღვინო. ამაზე მიუთითებს იმირის გორაზე აღმოჩენილი ვაზის რამდენიმე წიპწა. მორფოლოგიური და ამპელოგრაფიული ნიშნების მიხედვით იგი ვაზის კულტურულ სახეობას, ,,vitis vinisfera sativa-ს“ მიაკუთვნეს. სწორედ ამ ფაქტით იხსნება ლონდონში არსებული ღვინის ექსპოზიცია. მეცნიერები იმედოვნებენ, რომ იმირის გორაზე განახლებული გათხრების შედეგად საინტერესო აღმოჩენებს გააკეთებენ. სამუშაოები თვის ბოლომდე გაგრძელდება.